Deputeti i Partisë Demokratike, Asllan Dogjani, u paraqit për dy orë në Prokurorinë e Posaçme (SPAK) për t’u pyetur mbi pasurinë e tij, pas një kallëzimi të bërë nga një ndërtues, të cilin Dogjani e cilëson si “zaptues.” Duke folur për gazetarët pas daljes nga SPAK, ai shpjegoi se kallëzimi erdhi si kundërpërgjigje për denoncimin që ai vetë kishte bërë lidhur me grabitjen e një prone publike në Tiranë.

Sipas Dogjanit, ndërtuesi, në vend që të legalizonte pallatet e ndërtuara në vitin 2006, kishte uzurpuar një pronë publike, të cilën e kishte legalizuar në mënyrë të paligjshme për ta përdorur si parking privat. Banorët, së bashku me Dogjanin, kanë bërë kallëzim në SPAK dhe kanë paraqitur ankesa pranë Kadastrës, e cila anuloi legalizimin e pronës. Dogjani tha se ka kërkuar ndërhyrje edhe nga kryeministri Edi Rama dhe kryetari i Bashkisë Tiranë, Erion Veliaj, por pretendon se këta të fundit, në bashkëpunim me ndërtuesin, kanë organizuar një “kurth” për të.

“SPAK po heton për shtëpinë time, ku jetoj prej 20 vitesh me familjen,” tha Dogjani, duke sugjeruar se kallëzimi është një manovër për ta diskredituar atë pas përpjekjeve të tij për të mbrojtur hapësirat publike.