Miliarderi kosovar Behgjet Pacolli, pronar i 98% të aksioneve të Aeroportit të Vlorës, ka reaguar ashpër pas debatit publik mbi ndërtimin dhe financimin e këtij projekti.

Pacolli ka mohuar kategorikisht që qeveria shqiptare të ketë dhënë fonde për ndërtimin e aeroportit, duke theksuar se i gjithë investimi është bërë nga kompania koncesionare që ai zotëron.

“Asnjë qindarkë e shtetit shqiptar nuk është shpenzuar për këtë projekt dhe nuk do të shpenzohet as në të ardhmen. Të gjitha investimet mbulohen nga koncesionari, i cili do t’i rikuperojë mjetet e investuara gjatë afatit të përcaktuar në kontratë,” – deklaroi Pacolli.

Ai sqaroi se ndërtimi i Aeroportit të Vlorës financohet plotësisht nga koncesionari, ndërsa kontrata parashikon vetëm një garanci minimale për pasagjerët, një praktikë e zakonshme në marrëveshjet ndërkombëtare të këtij lloji.

Miliarderi i bëri thirrje mediave të mos përhapin informacione të pavërteta, duke i cilësuar lajmet e kundërta si “dezinformim të qëllimshëm që dëmton publikun dhe krijon konfuzion të panevojshëm”.