Një atentat mafioz ka ndodhur mbrëmjen e së mërkurës, pak para orës 22:00, në Gartenstrasse të qytetit Göppingen në Baden-Württemberg. Si pasojë e të shtënave në një ‘shisha bar’, një 29-vjeçar ka humbur jetën, ndërsa dy persona të tjerë kanë mbetur të plagosur rëndë.

Sipas informacioneve nga policia gjermane, autori i sulmit, i veshur me rroba të zeza, është larguar menjëherë nga vendi i krimit në këmbë. Një kontigjent i madh policor ka mbërritur në qendër të qytetit, duke rrethuar zonën përreth lokalit. Në fotot e operacionit, shfaqen edhe policë të maskuar, të armatosur me automatikë, duke sugjeruar se situata ishte mjaft serioze.

Një zëdhënës i policisë nuk ka dhënë detaje të mëtejshme mbi ngjarjen, duke refuzuar të komentojë se çfarë ndodhi saktësisht në qendër të qytetit Göppingen. Ky qytet, që ndodhet rreth 40 kilometra në lindje të Shtutgartit, ka pasur histori të ngjarjeve të dhunshme, por ende nuk dihen identitetet e viktimave dhe të plagosurve, as lidhjet që ata mund të kenë pasur me autorin e sulmit.

Policia kriminale ka marrë përsipër hetimet për të zbuluar rrethanat e incidentit dhe është ende e paqartë nëse krimi ka ndonjë lidhje me përplasjet e përgjakshme midis dy grupeve rivale në zonën më të madhe të Shtutgartit. Ky atentat sjell një tjetër shqetësim për sigurinë publike dhe aktivitetin e grupeve kriminale në këtë rajon.