Mediat greke kanë zbardhur detaje të tjera lidhur me atentatin që ndodhi në Athinë, ku 45-vjeçari Irakli Davella, nga Finiqi, u qëllua për vdekje me plumb në kokë, ndërsa biznesmeni Edi Lolo, banues në Tiranë, u plagos rëndë. Sipas Protothema, shënjestra e mundshme e sulmit ishte Edi Lolo, i cili kishte arritur disa ditë më parë nga Dubai.

Sulmuesit, të cilët kishin planifikuar atentatin me kujdes, vodhën një makinë dhe iu afruan viktimave jashtë një dyqani në kryqëzimin e rrugëve Aristotelous dhe Komotinit. Ata qëlluan me gjakftohtësi dhe u larguan menjëherë nga vendi i ngjarjes.

Nga hetimet e policisë greke, rezulton se Davella ishte pronar i një lokali në Peristeri dhe kishte lidhje të dyshuara me figura të njohura të krimit në Greqi. Ai dyshohet për aktivitete kriminale të kaluar, përfshirë organizimin e krimit dhe zhvatje. Lolo, nga ana tjetër, mund të ketë qenë në fokus të një grupi rival që synonte ta largonte nga rruga.

Sipas informacioneve të fundit, një tjetër person ka qenë i pranishëm në momentin e atentatit, por nuk ka pësuar lëndime. Hetimet për këtë ekzekutim mafioz janë ende në zhvillim.