Hetimet për atentatin mafioz të 11 nëntorit pranë rrethrrotullimit të aeroportit të Rinasit kanë zbuluar elementë të rinj lidhur me mënyrën e ekzekutimit dhe përgatitjen e ngjarjes.

Mjeti tip “Toyota”, i përdorur nga autorët, rezulton të jetë vjedhur në Greqi në tetor të vitit 2022. Edhe targat e saj, sipas burimeve të policisë, janë grabituri po në Greqi, gjatë vitit të kaluar. Hetuesit dyshojnë se përdorimi i një makine të vjedhur në një shtet tjetër u ka shërbyer autorëve për të shmangur gjurmët dhe identifikimin.

Ekspertiza mjekoligjore: 20 plumba në trupin e Gilmando Danit

Sipas ekspertizës paraprake të kryer në morgun e Tiranës, Gilmando Dani është qëlluar me 20 plumba, ndërsa në vendngjarje janë gjetur mbi 80 gëzhoja, duke konfirmuar se atentati ka qenë i planifikuar dhe i realizuar me një breshëri të dendur zjarri.

Ndërkohë, Muçi Shaljani (i njohur edhe si Sheqeri) vijon të jetë i shtruar në Spitalin e Traumës, i intubuar dhe në gjendje kritike, pasi ka marrë 10 plumba, mes tyre dy në kokë.

Hetimet shtrihen jashtë vendit: Policia kërkon informacion nga Spanja

Në vijim të hetimeve, Policia e Tiranës i ka kërkuar zyrtarisht autoriteteve spanjolle të vënë në dispozicion informacion mbi lëvizjet e Gilmando Danit dhe Muçi Shaljanit gjatë qëndrimit 4-ditor në Barcelonë. Të dhënat priten të jenë thelbësore për të zbardhur nëse atentati është organizuar jashtë vendit apo ka lidhje me aktivitetet e tyre të fundit.

Hetimet po vijojnë në disa pista paralele, ndërsa autorët ende nuk janë identifikuar.