Një ngjarje e rëndë ka tronditur Austrinë, pas vdekjes tragjike të alpinistes 33-vjeçare Kerstin Gunter, e cila më 19 janar humbi jetën gjatë një ngjitjeje në malin Grossglockner, në rreth 3.800 metra lartësi.

Sipas rindërtimit të bërë nga hetuesit, Gunter kishte shfaqur shenja të qarta lodhjeje dhe dezorientimi. Në atë moment, i dashuri i saj, Thomas Plamberger, kishte vendosur të zbriste për të kërkuar ndihmë, duke e lënë atë të vetme në kushte ekstreme. Ai është rikthyer pas rreth gjashtë orësh, por fatkeqësisht alpinistja ishte gjetur pa shenja jete.

Prokuroria austriake njofton se Plamberger dyshohet të ketë kryer gabime serioze në menaxhimin e situatës së emergjencës dhe tashmë përballet me akuzën për vrasje nga pakujdesia.

Hetimet po vijojnë për të përcaktuar nëse një ndërhyrje më e shpejtë apo një vendimmarrje më e kujdesshme në terrenin e vështirë malor mund të kishte shpëtuar jetën e alpinistes. Autoritetet po analizojnë çdo detaj të ngjitjes dhe të intervalit kohor kritik, ndërsa rasti ka ndezur debat të gjerë në opinionin publik austriak mbi sigurinë në alpinizëm dhe përgjegjësinë e partnerëve gjatë ekspeditave ekstreme.