Një ngjarje makabre ka tronditur publikun austriak, pasi Prokuroria e Innsbruck-ut ka ngritur akuza të rënda ndaj një çifti 27-vjeçar për vrasje, torturë dhe rrëmbim, lidhur me vdekjen e djalit të tyre trevjeçar në maj të vitit 2024.
Sipas hetimeve, fëmija ishte i rrahur, i lidhur dhe i mbajtur nën dhunë sistematike dhe privim ekstrem ushqimi e uji për muaj të tërë në banesën familjare në Kufstein, pranë kufirit me Bavarinë. Aktakuza përshkruan se djali shpesh mbahej lakuriq brenda një sirtari, ndërsa peshonte vetëm 7 kilogramë — më pak se gjysma e peshës normale për moshën e tij.
Hetuesit kanë siguruar provë materiale të shumta, përfshirë mesazhe, foto dhe video që dokumentojnë abuzimin. Ekspertiza psikiatrike konfirmoi se prindërit ishin plotësisht të përgjegjshëm, megjithëse me një çrregullim të rëndë personaliteti me tipare sadiste. Çifti pranoi përgjegjësinë gjatë marrjes në pyetje.
Sipas mediave, prindërit kishin nisur të izoloheshin dhe besonin se djali ishte “i pushtuar nga një demon”, duke justifikuar sjelljen e tyre makabre. Megjithatë, mjekët përjashtuan çdo paaftësi mendore që do t’u hiqte përgjegjësinë penale.
Rasti po konsiderohet si një nga më të rëndët e viteve të fundit në Austri, ndërsa çifti pritet të përballet me gjykatën e Innsbruck-ut në ditët në vijim.
