Një automjet është shkrumbuar totalisht nga flakët pak minuta më parë në bypassin e Murrizit, pjesë e rrugës së Arbrit. Dyshohet se në mjet ndodheshin dy të rinj, të cilët ishin nisur në drejtim të Qarkut Dibër. Për fat të mirë, asnjë pasojë nuk ka pasur për pasagjerët, ndërsa makina është shkatërruar plotësisht nga zjarri.

Zjarri ka shkaktuar trafik të gjatë në këtë segment të rrugës, pasi automjetet e tjera kanë pasur frikë të kalonin pranë mjetit të djegur për shkak të mundësisë së shpërthimit. Policia dhe grupi hetimor janë nisur drejt vendit të ngjarjes për të sqaruar shkaqet, ndërkohë që paraprakisht dyshohet se shkëndija elektrike nga mbinxehja e motorrit mund të ketë shkaktuar zjarrin.