Autoriteti i Konkurrencës ka nisur një hetim paraprak ndaj ndërmarrjeve të administrimit të rezidencave të banimit në qarkun e Tiranës lidhur me tregun e aksesit të shërbimit të internetit. Procedura është iniciuar pas ankesave të depozituara dhe vlerësimit të informacionit nga inspektorët në terren. Rezultatet kanë treguar se disa rezidencë kanë patur kufizime në zgjedhjen e ofruesve të shërbimit të internetit, duke ngritur dyshime mbi mundësinë e abuzimit me pozitën dominuese nga ndërmarrjet e administrimit. Hetimi do të konsiderojë periudhën nga janari 2020 deri më tetor 2023 dhe synon zbulimin e shkeljeve potenciale të ligjit për mbrojtjen e konkurrencës.

Monopole të ofrimit të shërbimit të internetit janë vërejtur në shumë godina të banimit, duke penguar zgjedhjen dhe duke krijuar një situatë ku banorët janë të detyruar të marrin shërbimet nga një ofrues i vetëm.

Ndërmarrjet e administrimit e ushtrojnë veprimtarinë e tyre në zbatim të ligjit të vitit 2009 “Për administrimin e bashkëpronësisë në ndërtesat e banimit”. Referuar nenit 19, të këtij ligji, Kryesia, në emër dhe për llogari të asamblesë, mund të lidhë kontratë për administrimin e bashkëpronësisë me një shoqëri administrimi ose një administrator, person fizik, i cili mund të jetë njëri prej bashkëpronarëve ose një person i jashtëm. Çdo person, fizik apo juridik, privat, që ka për objekt veprimtarie administrimin e ndërtesave, regjistrohet në librin e administruesve, pranë bashkisë, komunës, në juridiksionin e së cilës do ta ushtrojë këtë veprimtari.