Një imazh satelitor i datës 19 qershor ka zbuluar se avionët luftarakë amerikanë janë zhvendosur nga baza ajrore Al Udeid në Katar, duke lënë pistat thuajse të zbrazëta. Kjo lëvizje ka ndodhur përpara sulmit me raketa të ndërmarrë nga Irani, të hënën, në shenjë hakmarrjeje për sulmet ajrore të SHBA-së ndaj objekteve bërthamore iraniane fundjavën e kaluar.

Sipas dy zyrtarëve të mbrojtjes amerikane, të cilët kanë folur për CNN në kushte anonimiteti, kjo zhvendosje bën pjesë në strategjinë parandaluese të Pentagonit, e ndërtuar për të mbrojtur asetet dhe personelin amerikan në rajon, përballë një përshkallëzimi të shpejtë të tensioneve midis Iranit dhe Izraelit.

Në të njëjtën kohë, Marina Amerikane ka lëvizur të gjitha anijet luftarake nga baza detare Naval Support Activity Bahrain, në Bahrein, një nga portet më strategjikë të SHBA-së në Gjirin Persik. Kjo largim është kryer javën e kaluar, por destinacioni i saktë i avionëve dhe anijeve mbetet ende i panjohur.

Kjo qasje tregon se SHBA po parashikon skenarë të rinj për përshkallëzim dhe po merr masa për të shmangur humbje strategjike. Ndërkohë, komuniteti ndërkombëtar po bën thirrje për vetëpërmbajtje dhe rifillim të diplomacisë, për të shmangur një konflikt të gjerë në Lindjen e Mesme.