Avokati Andrea Zotaj, pjesë e Dhomës së Avokatisë në Gjirokastër, ka shpëtuar mrekullisht një atentati të kryer në orët e mbrëmjes së djeshme, më 28 mars.

Ngjarja ka ndodhur në rrugën e vjetër të fshatit Qesarat në Memaliaj, kur avokati Zotaj, i shoqëruar nga nipi i tij, ishin duke udhëtuar me makinën e tyre.

Fatos Lamaj, 36 vjeç, nga fshati Ane Vjosë në Memaliaj, u kishte pritur ata për të kryer atentatin.

Sipas dëshmisë së avokatit Zotaj, Lamaj e kishte pritur për ta ekzekutuar, por fati ka qenë me avokatin, i cili përmes një manovre të automjetit që drejtonte, arriti të shmangejë goditjeve të plumbave të shkrehura nga ana e agresorit Lamaj.

Dyshohet se bëhet fjalë për një konflikt për çështje pronash. Vëllai i avokatit Zotaj ka pasur konflikte të vazhdueshme për pronësinë e një toke.

Pasi shpëtoi nga atentati, avokati Zotaj denoncoi ngjarjen në Stacionin Policor dhe grupi hetimor ka shkuar në vendngjarje, ku ka gjetur gëzhojat e shkrehura nga kallashnikovi, dhe më pas ka bërë të mundur arrestimin e agresorit Lamaj.