Avokati mbrojtës i kryebashkiakut të Tiranës, Erion Veliaj, Plarent Ndreca, ka reaguar lidhur me dy proceset gjyqësore të zhvilluara gjatë ditës së sotme, duke u ndalur veçanërisht te përballja në Gjykatën Administrative me prokurorin e SPAK, Ols Dado.

Sipas Ndrecës, mbrojtja ka kërkuar konstatimin e pavlefshmërisë absolute të emërimit të Dados si prokuror i Republikës, duke argumentuar se ky është një akt që juridikisht konsiderohet sikur nuk ka ekzistuar kurrë.

Ai theksoi se gjatë seancës u evidentuan disa elemente problematike, si mungesa e dokumentacionit në Presidencë për procesin e përzgjedhjes së prokurorit, si dhe pranimi nga përfaqësuesit e këtij institucioni se, nëse procedura do të zhvillohej sot, emërimi nuk do të konfirmohej në të njëjtën formë. Po ashtu, u ngritën shqetësime edhe për konflikt interesi lidhur me rolin e Artur Metanit në proces.

Ndreca shtoi se kjo çështje ka pasoja jo vetëm për klientin e tij, por edhe në plan institucional, duke argumentuar se Bashkia e Tiranës është privuar nga drejtimi i kryetarit të zgjedhur për shkak të masës së sigurimit të kërkuar nga prokurori.

Gjykata, sipas tij, i ka lënë një afat 20-ditor palës paditëse për të thirrur Këshillin e Lartë të Prokurorisë si palë të paditur në proces.

Ndërkohë, lidhur me çështjen penale, avokati bëri të ditur se mbrojtja ka kërkuar kohë shtesë për shqyrtimin e dosjes, e cila përmban mbi 60 mijë faqe dhe mijëra prova. Gjykata ka pranuar kërkesën, duke dhënë një afat dyjavor për përgatitjen e strategjisë së mbrojtjes.