Ministri i Brendshëm, Taulant Balla, ka reaguar ndaj kërkesës së opozitës për të kaluar në votim kandidaturën për Avokatin e Popullit, duke theksuar se mungesa e konsensusit dhe mosrespektimi i një procesi të dakordësuar e bëjnë të pamundur këtë hap në seancën aktuale.

“Nuk shkruhet askund që Avokati i Popullit i takon opozitës, por ka një rregull të pashkruar, të cilin ne e kemi respektuar gjithmonë,” deklaroi Balla, duke sjellë në kujtesë modelin e vitit 2012, kur sipas tij u ndoq një proces transparent dhe gjithëpërfshirës, me konkurrencë të hapur dhe konsultim mes palëve.

Sipas tij, kërkesa e opozitës për të votuar një emër të vetëm është e papranueshme dhe ultimative:

“Ju nuk mund të vini me qëndrimin ‘o ky, o s’ka’. Peleshi, Çuçi dhe unë kemi kërkuar në mënyrë të përsëritur ndërtimin e një procesi. Sillni katër kandidatura, hiqen dy nga mazhoranca dhe shkohet në votim me dy të mbetura,” tha Balla.

Ai theksoi se për zgjedhjen e Avokatit të Popullit nevojiten 84 vota, të cilat nuk janë të garantuara pa bashkëpunim ndërpalak.

Në fund, Balla hodhi poshtë akuzat për zvarritje, duke ia adresuar opozitës përgjegjësinë për mosrealizimin e marrëveshjes së dakordësuar:

“Nuk keni dashur vetë ta zgjidhni këtë çështje,” përfundoi ai.