Berlin, Gjermani – Deputeti i Partisë Demokratike, Klevis Balliu, ka zhvilluar një vizitë zyrtare në Berlin, ku është takuar me dy anëtarë të Bundestagut gjerman: Axel Knoerig (CDU) dhe Lars Castellucci (SPD). Gjatë takimeve, Balliu ka denoncuar ashpër situatën politike në Shqipëri, duke akuzuar qeverinë Rama për kapje të shtetit dhe minimin e institucioneve demokratike.

Në një deklaratë për mediat pas takimeve, Balliu e cilësoi procesin zgjedhor të organizuar nga mazhoranca si një “farsë elektorale”, që sipas tij ka dëmtuar rëndë pluralizmin politik dhe ka deformuar vullnetin e qytetarëve shqiptarë.

“Minimi i pluralizmit politik përmes farsave elektorale nuk është vetëm një shkelje e standardeve demokratike, por një tradhti ndaj aspiratës së shqiptarëve për integrim europian,” u shpreh Balliu.

Ai theksoi se kapja e të gjitha institucioneve shtetërore nga pushteti aktual përbën një rrezik serioz për funksionimin e demokracisë dhe rrugën e Shqipërisë drejt Bashkimit Europian.

Deputeti demokrat vlerësoi vëmendjen që partnerët gjermanë i kushtojnë zhvillimeve politike në rajon dhe theksoi se bashkëbisedimi me Knoerig dhe Castellucci tregoi mbështetjen e tyre për demokracinë dhe sundimin e ligjit në vendet që synojnë integrimin europian.

Vizita e Balliut vjen në një moment kritik për Shqipërinë, ku opozita ka rritur tonet kundër qeverisë Rama, duke e akuzuar për uzurpim të institucioneve, shtypje të zërit opozitar dhe abuzime në proceset zgjedhore.