Ditën e sotme u zhvillua në Tiranë konferenca e drejtorëve të përgjithshëm të doganave të Ballkanit Perëndimor, ku Zëvendëskryeministrja Belinda Balluku vuri theksin te rëndësia e avancimit në digjitalizim dhe përdorimi i Inteligjencës Artificiale për të përmirësuar sistemet doganore.

Balluku theksoi se mbyllja e negociatave të Shqipërisë për anëtarësim në Bashkimin Evropian brenda vitit 2027 mbetet një objektiv ambicioz, por i rëndësishëm, dhe se duhet që të punohet fort në masa konkrete për të lehtësuar tregtinë e bizneseve në rajon.

“Synimi kryesor është të fokusohemi në masa konkrete për të lehtësuar tregtinë e bizneseve. Shqipëria ka bërë përparime në digjitalizimin e doganave dhe përdorimin e Inteligjencës Artificiale që sjellin ndryshime reale,” u shpreh ajo.

Në fjalën e saj, Balluku ftoi gjithashtu pjesëmarrësit që t’i kushtojnë pak kohë vizitës së Tiranës, duke e cilësuar kryeqytetin si “një galeri të gjallë të arkitekturës botërore”, dhe nënvizoi potencialin e madh të sektorit të turizmit në vend.