Zëvendëskryeministrja dhe ministrja e Infrastrukturës dhe Energjisë, Belinda Balluku, ka zhvilluar një udhëtim me tren nga Zyrihu në Bern, ku mori pjesë në një takim dypalësh me Ministrin Federal zviceran për Transportin, Energjinë dhe Mjedisin.

Gjatë udhëtimit, Balluku theksoi se Qeveria shqiptare synon të thellojë bashkëpunimin me hekurudhën zvicerane, duke e parë Zvicrën si një model për zhvillimin e transportit hekurudhor në vendin tonë.

“Shumë mirë do ishte që të bënim rrugëtimin me tren nga Zvicra në Shqipëri, dhe do ta realizojmë këtë përmes korridoreve hekurudhore europiane ku Shqipëria po bëhet pjesë,” tha Balluku.

Ajo shtoi se udhëtimi kishte për qëllim testimin e efikasitetit të sistemit hekurudhor zviceran dhe planifikimin e një bashkëpunimi të ardhshëm teknik, që do të nisë me projektin Tiranë–Durrës, si faza e parë e modernizimit të transportit hekurudhor shqiptar.

“Po bëjmë plane për një bashkëpunim të ngushtë me hekurudhën zvicerane, për zhvillimin e transportit hekurudhor në Shqipëri,” u shpreh ministrja, duke e cilësuar këtë si një hap drejt integrimit të rrjetit shqiptar në korridoret hekurudhore të Europës.