Kreu i Partisë Demokratike, Sali Berisha, deklaroi sot nga Foltorja e demokratëve në Elbasan se qeveria ka kryer një seri skandalesh abuzive dhe vjedhjesh të fondeve publike përmes tenderëve dhe koncesioneve.

Berisha akuzoi zv/kryeministren Belinda Balluku dhe kryeministrin Edi Rama për zhdukjen e 50 milionë eurove nga tuneli i Llogarasë, ndërsa për projektin e aeroportit të Vlorës, sipas tij, kompania do të përfitojë 140 milionë euro për bileta të munguara gjatë dhjetë viteve të para të koncesionit 35-vjeçar.

Kreu i opozitës denoncoi gjithashtu skandalin e “Tigrave”, kompani që sipas tij ka marrë mbi 100 milionë euro pa prodhuar asnjë kilovat energji, dhe faljen e borxheve të Bankersit, me vlerë rreth 120 milionë euro, duke e cilësuar këtë si shkelje të sistemit tatimor.

Berisha theksoi se këto abuzime nuk janë veç raste të izoluar, por pjesë e një praktike të gjerë korruptive që dëmton interesin publik dhe qytetarët shqiptarë. Ai akuzoi qeverinë se vepron në mënyrë të pandëshkueshme dhe favorizon kompanitë e lidhura me pushtetin.