Në një hap të ri drejt përfshirjes dhe përfaqësimit të gjithanshëm, kompania Mattel ka prezantuar kukullën e parë Barbie me diabet të tipit 1, pjesë e linjës që synon të pasqyrojë më mirë realitetin dhe përvojat e ndryshme të fëmijëve.

Kjo kukull, e cila vjen si rezultat i bashkëpunimit me organizatën Breakthrough T1D, është më shumë sesa një lodër – është një mjet edukimi, ndërgjegjësimi dhe normalizimi për fëmijët që përballen me këtë sëmundje autoimunitare.

E pajisur me monitor glukoze në krah, një celular me aplikacion për matjen e sheqerit në gjak, një pompë insuline dhe çantë për ushqime të nevojshme, Barbie me diabet sjell një pasqyrim realist të jetesës me këtë gjendje shëndetësore. Detajet janë përpunuar me kujdes, duke përfshirë edhe ngjitësen mjekësore në formë zemre, për ta bërë sa më të afërt me realitetin e përditshëm të fëmijëve që jetojnë me diabet.

“Barbie ndihmon fëmijët të formojnë perceptimet e para për botën, dhe duke pasqyruar sëmundje si diabeti i tipit 1, ne sigurohemi që më shumë fëmijë ta shohin veten në historitë që përfytyrojnë dhe kukullat që duan,” – deklaroi Krista Berger, zëvendëspresidente e Barbie.

Kjo nismë vjen në vazhdën e përpjekjeve të Mattel për ta bërë linjën e saj më gjithëpërfshirëse. Aktualisht, kompania ofron mbi 175 lloje Barbie me ngjyra të ndryshme lëkure, trupash, sysh dhe flokësh, si dhe me karakteristika të veçanta shëndetësore: një Barbie me sindromën Down, një me aparat dëgjimi, një tjetër me proteza, karrige me rrota, vitiligo apo që është e verbër.

Me këtë kukull të re, Barbie nuk është më thjesht një ikonë mode, por edhe një aleate në betejën për pranimin dhe vetëbesimin që nis që në fëmijëri.