Gazment Bardhi sqaroi temat që u diskutuan në tryezën e opozitës parlamentare. Çështje kryesore ishte rezoluta për Kosovën, ku Bardhi akuzoi mazhorancën se nuk ndahen dot nga qëndirmi i Serbisë për ngjarjet e 24 shtatorit.

“Nuk ka dakordësi për të dalë me një rezolutë të përbashkët se PS nuk mbështet rezolutën e parlamentit të Kosovës. Nuk pranon që të identifikojë përgjegjësit real të situatës së krijuar më 24 shtator. Grupi i PD me vullnet të plotë jemi të unifikuar, ka bërë çdo përpjekje për të pasur një rezolutë të përbashkët. PS-ja të heq dorë nga qëndrimi i Serbisë dhe të mbështesim Kosovën. Kjo ka qenë çështja themelore e mbledhjes së grupit parlamentar”, tha Bardhi.

Sa i përket vendimit të Lulzim Bashës për ta përjashtuar nga partia, Bardhi u shpreh se duhet marrë me të qeshur.

Sipas tij, Basha është përjashtuar nga PD-ja me vendim të anëtarësisë dhe nuk ka turpërim më të madh se ky. Basha thjesht e vetëm po përpiqet të tërheqë vëmendjen nga 2 katet e kullës që ka përfituar.

“Merreni me të qeshur aktet jo serioze të kolegut Lulzim Basha. Do të zhvendosë vëmendjen. Nëse ky vendim e ndihmon që 2 katet e kullës mos t’i shohin njerzit le t’i marrë. Katet janë aty, letrat janë aty.

Nuk i doli aleanca e kullave, mendoi se do bënte aleancën e të përjashtuarve. Basha është përjashtuar nga partia me vendim të anëtarëve. Nuk ka përjashtim më të rëndë për një anëtar të një partie, për një ish-kandidat kryeministër se të shpalli non-grata anëtarësia e një partie”, u shpreh Bardhi.