Kreu i Grupit Parlamentar të Partisë Demokratike, Gazment Bardhi, ka reaguar për ngjarjen tragjike në Shkodër ku tre persona u vranë, duke shprehur kritikë të ashpër ndaj policisë për mosveprim ndaj kërcënimeve të mëparshme që kishte denoncuar një prej viktimave, Arlind Bushati. Sipas Bardhit, Bushati kishte raportuar një atentat të dështuar ndaj tij rreth tre javë më parë, më 10 tetor, por autoritetet nuk ndërmorën asnjë veprim për të identifikuar përgjegjësit.

“A mund të thoni se çfarë bëri Policia e Shtetit për identifikimin e autorëve të asaj tentative?”, tha Bardhi, duke vënë në dukje se mosidentifikimi i tyre ka çuar sot në një ngjarje me pasoja tragjike. “Nëse do të ishin në krye të detyrës dje, policia dhe SPAK nuk do të kishte ndodhur masakra në mes të Shkodrës. Një nga viktimat vetëm 3 javë më parë ka denoncuar një atentat të dështuar në qendër të Shkodrës,” shtoi ai.

Bardhi theksoi se ky rast duhet të ishte prioritet për policinë dhe institucionet, duke vënë në pah neglizhencën e autoriteteve që, sipas tij, po përqendrohen më shumë në intimidimin e opozitës sesa në mbrojtjen e qytetarëve.

“Sa kohë nuk kemi shkelur ligjin dhe nuk kemi vjedhur me 5D, inceneratorë, vjedhje energjie e tunel Llogaraje, as nuk intimidohemi, as nuk trembemi. Sa herë do të shkojmë, do të tallemi, siç ka bërë sot edhe kolegia,” përfundoi ai, duke aluduar për rastet e korrupsionit dhe abuzimit me fonde publike që lidhen me qeverinë dhe mungesën e hetimeve ndaj tyre.