Policia e Tiranës ka finalizuar me sukses operacionin e koduar “Synimi”, duke goditur një rast të transportimit dhe tentativës për shitje të armëve dhe lëndëve shpërthyese.

Gjatë ndërhyrjes, në rrugën e fshatit Shëngjergj, u arrestua në flagrancë shtetasi U. M., 46 vjeç, banues në Tiranë. Sipas policisë, ai dyshohet se kishte marrë armët dhe municionin në këtë zonë, me qëllim shitjen e tyre në kryeqytet.

Nga kontrolli në automjetin që ai drejtonte, u sekuestruan 4 kallëpë tritoli, 2 armë zjarri dhe 1500 fishekë të kalibrave të ndryshëm. Në cilësinë e provës materiale u sekuestruan gjithashtu automjeti dhe telefoni celular i të arrestuarit.

Hetimet vijojnë nën drejtimin e Prokurorisë së Tiranës për identifikimin dhe arrestimin e personave të tjerë të përfshirë në këtë veprimtari kriminale.