Në nisje të protestës së opozitës kundër mbylljes së TikTok, kreu i Grupit Parlamentar të PD-së, Gazment Bardhi, ka hedhur akuza të forta ndaj kryeministrit Edi Rama, duke e cilësuar vendimin si një tentativë për censurë dhe kufizim të lirisë së shprehjes.

“Është një protestë e thirrur nga të rinjtë dhe ka mbështetjen e partisë dhe të kryetarit. Akti i mbylljes ka të bëjë me një tentativë për të vendosur censurë, ndaj duhet të protestohet. Ne jemi në mbështetje të çdo të riu që lirinë e fjalës e ka marrë dhe nuk mund të censurohet,” u shpreh Bardhi.

Ai gjithashtu akuzoi Ramën për strategji të përsëritura për të penguar qytetarët të shprehen lirshëm, duke e krahasuar këtë veprim me atë të vitit 2021, kur qeveria vendosi kufizime për emigrantët në prag të zgjedhjeve.

“Në 2021 Rama përdori trukun e mbylljes së kufijve për të mos ardhur në votim. Edhe këtë herë ai kërkon të bëjë gjithçka për të mbyllur çdo hapësirë lirie që qytetarët të shprehen,” përfundoi Bardhi.

Protesta vazhdon, me pjesëmarrje të konsiderueshme të të rinjve dhe drejtuesve të opozitës, ndërsa qeveria ende nuk ka dhënë një reagim zyrtar mbi kërkesat e tyre.