Me një postim në rrjetin social X, Gazment Bardhi komentoi deklaratën e Kryeministrit Edi Rama gjatë konferencës me Presidenten e Komisionit Europian, Ursula von der Leyen, ku ai tha se “duhen dy për një tango”. Bardhi iu përgjigj Ramës duke theksuar se ai ka zgjedhur “dyshen” e tij: krimin e organizuar.
Deputeti theksoi se Kryeministri ka vendosur të “bëjë tango” me figura të dyshimta si Altin Hajri, i cili, sipas tij, dikton listën e deputetëve, dhe Avdylajt, që po ashtu ndihmojnë në formimin e listave. Bardhi e akuzoi Ramën se duke marrë këto vendime, ai po vallëzon me muzikën që krimi i organizuar dëshiron.
Më tej, ai theksoi se ndërsa Kryeministri bën aleanca me krimin, opozita është angazhuar për të përfaqësuar interesat e publikut, duke “vallëzuar muzikën” që përfaqëson vlerat europiane në qeverisje dhe që garanton mirëqenien e qytetarëve.
“Duhen dy për një tango pa asnjë diskutim! Dhe ti e ke zgjedhur dyshen tënde të tagos: krimin e organizuar. Ti ke vendosur të bësh tango me Altin Hajrin, që të dikton të 3 në listën e kandidatëve dhe ti i vendos firmën. Ti ke vendosur të bësh tango me Avdylajt, që të diktojnë të 5 në listën e kandidatëve dhe ti i vendos firmën. E ndërkohë që ti bën tango me krimin e organizuar, duke vallëzuar muzikën që krimi i organizuar dëshiron, opozita ka vendos të bëjë tango me interesin publik, për të vallëzuar çdo shqiptarë muzikën që përfaqëson vlerat europiane në qeverisje dhe që garanton mirëqenien e tyre”.
