Deputeti Gazment Bardhi ka zhvilluar një vizitë në Parlamentin Britanik, ku u takua me deputetët britanikë Martin Vickers dhe Stephen Gethins, të cilët janë mbështetës të fortë të Shqipërisë dhe të marrëdhënieve mes dy vendeve. Bardhi shprehu mirënjohjen për kontributin e tyre dhe theksoi rëndësinë e mësimit nga modeli demokratik i Britanisë.

Në diskutime, u trajtuan një sërë temash të rëndësishme për Shqipërinë, si:

•Zgjedhjet e lira dhe të ndershme: Bardhi kërkoi implementimin e një qeverie kujdestare për të siguruar standarde zgjedhore, një model i suksesshëm i ndjekur më parë nga Maqedonia e Veriut.

•Shteti ligjor dhe drejtësia e pavarur: Theksi u vu në nevojën për reforma në drejtësi që të garantojnë barazi dhe pavarësi institucionale.

•Largimi masiv i të rinjve nga Shqipëria: U shpreh shqetësimi për fenomenin e emigrimit të të rinjve shqiptarë për shkak të mungesës së meritokracisë dhe mundësive ekonomike në vend.

Bardhi falënderoi deputetin Vickers për mbështetjen e Partisë Konservatore Britanike ndaj Partisë Demokratike, veçanërisht në miratimin e Rezolutës për Shqipërinë në Mbledhjen Ekzekutive të IDU, që ishte një analizë realiste e situatës në vend dhe një mbështetje për reformat e propozuara nga PD.

Ai gjithashtu njoftoi se në fillim të vitit 2025 një delegacion i Partisë Konservatore Britanike do të vizitojë Shqipërinë për të thelluar bashkëpunimin mes dy partive dhe për të forcuar mbështetjen ndaj kauzave demokratike në vend.

Vizita e Bardhit në Britani përbën një hap të rëndësishëm në forcimin e partneritetit strategjik mes Shqipërisë dhe Mbretërisë së Bashkuar, si dhe në promovimin e reformave të nevojshme për zhvillimin demokratik të Shqipërisë.