Kryetari i Partisë Demokratike, Lulzim Basha, ka komentuar deklaratat e Arben Ahmetajt lidhur me kryeministrin Edi Rama. Basha tha se Ahmetaj ka treguar me gisht se Rama dhe Veliaj janë pjesë e një skeme mjaft korruptive, duke shtuar se kjo tregon se të gjithë janë të përfshirë në korrupsion. Në fjalën e tij, Basha theksoi se sulmet ndaj SPAK (Specialja për Korrupsion dhe Krime të Rënda) janë një tentativë për ta kërcënuar dhe intimiduar atë, duke shtuar se kjo tregon se korrupsioni ka penetruar thellë në strukturat qeveritare.

“Meraku që kanë është një ofensivë ndaj SPAK për ta kërcënuar, intimiduar. Kjo është e kuptueshme se s’kanë kaluar as 10 ditë që kur zv.kryeministri tregoi me gisht Ramën e Veliaj si bashkëpronar dhe përfitues të skemës më korruptive, afera e inceneratorëve. Kjo tregoi që janë të gjithë bashkë të zhytur në korrupsion. Kjo tregon pse i janë përveshur SPAK dhe drejtësisë se kanë frikë. Deri para ca kohësh i kishin në xhep prokurorë e gjyqtarë, hetimet përfundon në asgjë apo nuk çelshin fare. Frika e të paprekshmeve nga drejtësia është edhe produkti i parë i reformës në drejtësi”, tha Basha.