Kreu i Demokratëve Euroatlantikë, Lulzim Basha, ka reaguar me ironi pas protestës së radhës të Sali Berishës para Prokurorisë së Posaçme (SPAK). Basha e ka krahasuar këtë situatë me një “radha qumshti”, duke theksuar se një ditë proteston njëri, ndërsa ditën tjetër tjetri, duke i sugjeruar që të bashkojnë protestat e tyre për të kursyer energji.

Në një reagim të tij në mediat sociale, Basha tha: “Janë bërë protestat para SPAK-ut si radha e qumshtit, një ditë njeri, një ditë tjetri. Hiqjani merakun njëri-tjetrit, kursejini energji, bëjini protestat bashkë.”

Kreu i Demokratëve Euroatlantikë theksoi gjithashtu se Shqipëria meriton drejtësi dhe shprehu bindjen se ajo do të vijë një ditë, duke sugjeruar se protestat e tilla nuk janë zgjidhja për problemet e vendit.