Kandidati i Partisë Demokratike për qarkun e Dibrës, Basir Çollaku, ka akuzuar rivalët socialistë për shpërndarje mielli në këmbim të votës për zgjedhjet lokale të 11 majit. Në një postim në Facebook, Çollaku pretendon se një furgon me ngjyrë të verdhë, që dyshohet të ketë qenë në pronësi të njësisë administrative të Ulëzit, ka shpërndarë miell në fshatin Bushkash.

Sipas Çollakut, furgoni ka ndaluar derë më derë në këtë fshat dhe ka shpërndarë ndihma për banorët. Ai theksoi se ka bërë denoncim në komisariatin e policisë dhe ka dokumentuar ngjarjen me foto.

“Furgoni i miellit?!?! Sot rreth orës 17:30, një furgon “Mercedes Benz” sprinter i verdhë ka hyrë në zonën e Bushkashit, duke ‘inspektuar’ banesat me sajdisje. Në timonin e mjetit ishte një eksponent i PS të Matit, dhe furgoni shoqërohej nga një fuoristradë në të cilën kishte punonjës të njësisë administrative Ulëz”, shkruan Çollaku në postimin e tij.

Çollaku shton se ka informuar policinë dhe ka kërkuar verifikimin e ngjarjes përmes kontrollit të telefonave të personave që ndodheshin në mjetin e dyshuar, për të ndjekur rrugëtimin e tij dhe për të verifikuar ngjarjen.

Nga ana e saj, Policia e Matit ka kryer verifikimet në drejtim të Prokurorisë Dibër dhe ka shoqëruar drejtuesin e furgonit, por nuk ka konstatuar ndonjë veprim të kundërligjshëm në lidhje me shpërndarjen e miellit.

Ky incident ka tërhequr vëmendjen e opinionit publik dhe është një nga disa akuza të ngritura nga kandidatët dhe partitë politike kundër rivalëve të tyre për manipulime të mundshme zgjedhore.