Duke marrë shkas nga zjarret masive që kanë ‘pushtuar’ shumë vende europiane, Bashkimi Europian ka aktivizuar Mekanizmin e Mbrojtjes Civile.

Komisioni Evropian bën me dije se do të ketë mbështetje me vendet e prekura.

BE do të ofrojë ndihmë për Shqipërinë, Italinë, Maqedoninë e Veriut si dhe Greqinë. Bëhet e ditur se BE do të ndihmojë vendin tonë me dy helikopterë.

“Solidaritet evropian me Italinë, Greqinë, Shqipërinë dhe Maqedoninë e Veriut, që po luftojnë aktualisht me zjarret shkatërruese. Qipro, Çekia, Franca, Sllovenia dhe Holanda po vendosin në gatishmëri aeroplanë zjarrfikës, helikopterë dhe një ekip zjarrfikësish përmes Mekanizmit të Mbrojtjes Civile”, thuhet në reagimin në “Twitter”.

“Dy helikopterë për të mbështetur operacionet në Shqipëri do të dërgohen nga Çekia dhe Holanda”, thuhet në njoftim.

Dy aeroplanë zjarrfikës ‘Canadair’ nga Franca po dërgohen në zonat e prekura në Itali për të filluar operacionet e shuarjes së zjarrit sot.