Për më shumë se 3 orë, zv.kryeministrja, njëkohësisht ministre e Infrastrukturës dhe Energjisë, Belinda Balluku, ka dëshmuar në Prokurorinë e Posaçme në lidhje me hetimet për inceneratorin e Tiranës. Pas daljes së saj nga SPAK, ajo shprehu shpresën se dëshmia e saj do të kontribuojë në zbardhjen e dosjes.

Balluku tha se dosja e inceneratorit ka bërë pis të madh dhe të vogël, dhe është koha që të zbardhet për të ndarë e mira nga e keqja dhe për të dalë puna e ndershme nga abuzimi i pafalshëm.

Ishte një thirrje për dosjen 225 që është dosja e inceneratorëve. Duhet të jepja disa sqarime që besoj të kenë shërbyer në zbardhjen e kësaj dosje. Kam dhënë dëshmi që besoj të kenë shërbyer në zbardhjen e kësaj dosje. Kjo është ndarja e re e pushteteve, drejtësia ka punën e saj, qeveria ka punën e saj dhe parlamenti punën e tij. Ne jemi këtu për ta mbështetur drejtësinë. Kjo dosje ka bërë pis të madh e të vogël dhe i ka ardhur koha të zbardhet, në mënyrë që të ndahet e mira nga e keqja e të ndahet puna e ndershme nga abuzimi pafalshëm.’- tha Balluku, pas përfundimit të marrjes në pyetje.

Prokurori Dritan Prençi e thirri Ballukun për të dhënë sqarime lidhur me dosjen e inceneratorit të Tiranës, duke shprehur se hetimet janë drejt fundit. Kjo pasi më 30 prill 2024, për më shumë se 8 orë, u mor në pyetje edhe kryebashkiaku Erion Veliaj, si person që ka dijeni për çështjen.