Ish-kryeministri Sali Berisha ka publikuar një tjetër denoncim përmes “qytetarit dixhital”, duke akuzuar deputetin e Partisë Socialiste dhe ish-kryebashkiakun e Matit, Agron Malaj, se po ndërton një rrugë personale me paratë e qytetarëve.

Sipas denoncimit, rruga në fjalë lidh banesën e Agron Malajt në fshatin Lis me rezervuarin e fshatit Shqefen, dhe ka një gjatësi prej rreth 5 kilometrash. Qytetari pretendon se rruga nuk i shërben askujt tjetër përveç Malajt dhe se punimet po kryhen me makineritë e Bashkisë së Matit, pa u zhvilluar asnjë procedurë tenderimi.

Në postimin e tij në rrjete sociale, Berisha e cilëson këtë veprim si një “akt të pastër korrupsioni”, duke kërkuar transparencë për mënyrën se si po përdoren fondet publike në këtë projekt.

“Zoti Berisha, shiko sesi taksat e qytetarëve të Matit përdoren për interesat personale të Agron Malajt, ndërkohë që mijëra banorë nuk kanë rrugë për të shkuar në banesat e tyre. Rruga nga banesa e tij në fshatin Lis deri te rezervuari i Shqefenit po ndërtohet nga makineritë e bashkisë, pa asnjë tender apo të dhënë publike. Kostoja e saj mund të shkojë mbi 200 mijë dollarë,” – shkruan qytetari denoncues.

Nga ana e tij, Agron Malaj nuk ka reaguar ende publikisht ndaj këtyre akuzave.
Ndërkohë, denoncimi ka ngjallur reagime të shumta në rrjet, ku kërkohet verifikimi i menjëhershëm nga organet hetimore dhe Kontrolli i Lartë i Shtetit për të sqaruar nëse fondet publike po përdoren në mënyrë abuzive.