Kreu i Partisë Demokratike, Sali Berisha, i cili ndodhet nën akuzë nga SPAK për korrupsion pasiv në aferën e dosjes “Partizani” dhe është liruar së fundmi nga arresti shtëpiak pas gati një viti, ka vijuar sulmet ndaj mazhorancës duke u ndalur te shpenzimet për veshje dhe aksesorë luksi. Gjatë një mbledhjeje në selinë blu, Berisha kritikoi ekonominë e qeverisjes socialiste dhe përmendi përdorimin e çantave të markave luksoze si ‘Hermes’, ‘Birkin’, ‘Bottega Veneta’ dhe ‘Louis Vuitton’ nga ministret e kabinetit qeveritar, çanta që sipas tij kushtojnë mijëra euro.

Megjithatë, Berisha ka injoruar faktin se edhe në familjen e tij është i pranishëm një stil jete i ngjashëm. Nusja e djalit të tij, Shkëlzen Berisha, Armina Mevlani, e njohur për jetën e saj të luksit që pasqyron shpesh në rrjetet sociale, raportohet se ka shpenzuar 38 mijë euro vetëm për gjashtë çanta nga të njëjtat marka që ai përmend në kritikat ndaj mazhorancës.

Berisha vazhdon të sulmojë mazhorancën për korrupsion dhe shpërdorim të parasë publike, duke përdorur si shembull stilin e jetesës dhe shpenzimet e deputetëve dhe ministrave, por kjo kritikë duket njëanshme, pasi ai shmang përmendjen e luksit të shfaqur brenda familjes së tij.

Ironikisht, ndërsa akuzon zyrtarët e qeverisë për pasuri dhe ekstravagancë, të njëjtat fenomene janë të dukshme edhe në rrethin e tij familjar. Publikimi i fotografive të aksesorëve të shtrenjtë nga Mevlani ka ngjallur diskutime, duke ngritur pyetje mbi standardet e dyfishta në retorikën e ish-kryeministrit.

Ky zhvillim hedh dritë mbi përpjekjen e Berishës për të kritikuar kundërshtarët politikë, ndërsa shpërfill pasqyrimin e luksit në anën tjetër të medaljes, duke nxitur debat publik mbi koherencën dhe ndershmërinë e tij në deklaratat politike.