Kreu i Partisë Demokratike, Sali Berisha, vizitoi mbrëmë Spitalin e Traumës për të marrë informacion mbi gjendjen e deputetit të PD, Bledion Nallbati, i cili pësoi një goditje në kokë gjatë përplasjeve me policinë pas protestës së opozitës.

Berisha kritikoi ashpër sjelljen e forcave të rendit, duke thënë se policët “u sollën si bisha” ndaj deputetit dhe u treguan të papërgjegjshëm edhe gjatë komunikimit me stafin mjekësor. Ai e konsideroi incidentin si një akt të qëllimshëm politik.

“Deputeti Bledi Nallbati është në gjendje jo të mirë. Ka qenë një sulm personal ndaj tij, pa asnjë shkak. Banditët kanë shkuar dhe e kanë goditur,” deklaroi Berisha.

Ai akuzoi Sokol Bizhgën si urdhërdhënësin e goditjes, duke e cilësuar si një nga figurat më të damkosura të policisë shqiptare. Berisha shtoi se akti kishte marrë urdhër nga Kryeministri Edi Rama dhe paralajmëroi se përgjegjësia do të ndiqet deri në fund.

Deputeti Nallbati ka një hematomë në indet e buta dhe do të qëndrojë nën observim sipas protokollit spitalor për të monitoruar pasojat e mundshme nga goditja.