Kryeministri Edi Rama, gjatë Asamblesë së Partisë Socialiste në Njësinë nr.2 këtë të shtunë, u ndal te çështjet ekonomike dhe sociale që prekin jetën e qytetarëve. Ai deklaroi se pagat në sektorin publik dhe privat janë rritur dhe theksoi se prioritet mbeten pensionet, të cilat sipas tij do të dyfishohen çdo vit.

Duke u ndalur te çmimet e naftës, Rama tha se ato po ndikohen nga konflikti në Iran, por shtoi se shteti ka ndërhyrë për të stabilizuar tregun dhe për të mbrojtur qytetarët. “Jemi i vetmi vend që kemi ulur çmimin e energjisë me 10 përqind. Me Bordin e Transparencës kemi diktuar çmimin e naftës dhe do të garantojmë rezervat për çdo rast,” tha ai.

Kryeministri paralajmëroi gjithashtu futjen në treg të komponentëve shtetërorë dhe disa risive teknologjike që pritet të rrisin të ardhurat e buxhetit të shtetit, duke theksuar rëndësinë e reagimit të shtetit ndaj krizave ekonomike: “Qoftë me pandeminë, me tërmetin apo luftën në Ukrainë, kemi bërë reagime që kanë lehtësuar njerëzit dhe kanë ndihmuar ekonominë të mos rrëzohet.”