Kryetari i Partisë Demokratike, Sali Berisha, është shprehur se kryeministri Edi Rama nëse tenton të bllokojë qytetarët në protestën e 6 dhjetorit, do të përballet me reagimin e ashpër të qytetarëve.

Komentet Berisha i bëri gjatë takimit të përjavshëm me gazetarët, ku shtoi se do të zbatojnë kushtetutën, e cila lejon lirinë e tubimeve.

Ai shtoi se ditën e Samitit, edhe nëse Rama provokon, përballja do të shmanget, por sipas tij do të rezervohet për një ditë tjetër nëse kjo ndodh.

“Regjistrimi i simpatizantëve ka patur një afat, ka mundësi që dje ose pardje të ketë përfunduar afati për të dorëzuar listat. Sapo të hidhen në database, ato do u jepen kandidatëve. Numri total nuk mund të jetë sekret. Ne do të zbatojmë kushtetutën.

Kemi shpallur protestën tonë në boulevard dhe ashtu do të bëhet. Edi Rama kërkon përballje, por ne do të përpiqemi ta shmangim atë ditë, por do t’ja rezervojmë një ditë tjetër. Populli opozitar po përgatitet që të japë përgjigjen e duhur. Përveç kodit që ma ka thënë Gjyshja ime që kur të kesh kohë për të vjedhur vidh, ai do të marrë mesimet e duhura”, është shprehur Berisha.