Kreu i Partisë Demokratike, Sali Berisha, zhvilloi sot një takim me fermerët e Dimalit në Berat, ku prezantoi pjesë nga programi i “PD-ASHM” për bujqësinë dhe ekonominë rurale. Në nisje të fjalës së tij, Berisha përshëndeti pjesëmarrjen e deputetes italiane Erica Massetti, të cilën e cilësoi një “mike të shquar të Shqipërisë dhe Partisë Demokratike”.

“Zonja Massetti ndodhet sot këtu për të mbështetur opozitën shqiptare, si një dëshmi e lidhjeve të forta që na bashkojnë me Forza Italia, që prej kohës së mikut të madh të shqiptarëve, Silvio Berlusconi,” tha Berisha, duke nënvizuar lidhjet ndërkombëtare të PD-së.

Në vijim, ai premtoi një kthesë të madhe në mbështetjen për fermerët shqiptarë pas zgjedhjeve, duke denoncuar nivelin aktual të subvencioneve si “diskriminim të pafalshëm” krahasuar me vendet fqinje.

“Fermerët në Kosovë, Maqedoni, Mal të Zi dhe Serbi marrin pesë herë më shumë subvencione se ju. Hapja e tregut pa mbështetje për fermerin vendas është një padrejtësi. Ne do ta ndalim këtë,” deklaroi Berisha.

Ai e quajti të papranueshme që, ndonëse bujqësia kontribuon me 19% në Prodhimin e Brendshëm Bruto dhe punëson rreth 500 mijë shqiptarë, buxheti i shtetit jep vetëm 32 milionë euro në vit për këtë sektor. “Shifra qesharake”, e cilësoi ai, duke bërë krahasim me 220 milionët që ndan Maqedonia për fermerët.

“Ne do e çojmë këtë mbështetje në 230 milionë euro. Çdo fidan që do mbillni, çdo bagëti që do mbani, çdo njësi prodhimi do të subvencionohet. Ky është një premtim solemn,” u shpreh lideri demokrat.

Në përfundim, Berisha ritheksoi qëndrimin e tij të prerë kundër nismës rajonale Ballkani i Hapur, të cilën e quajti “projekt që do përfundojë në koshin e plehrave që javën e parë”.