Partia Demokratike nuk do ta ankimojë zgjedhjen e Avokatit të Popullit në Gjykatën Kushtetuese. Vendimi u bë i ditur nga kryetari i PD-së, Sali Berisha, gjatë mbledhjes së Kryesisë, ku theksoi se opozita nuk do të ndërmarrë asnjë hap ligjor për këtë çështje.

“Ne nuk do merremi as në Gjykatën Kushtetuese. Ky ishte gabim dhe ne duhet ta pranojmë”, u shpreh Berisha, duke pranuar hapur përgjegjësinë politike për procesin.

Kreu i PD-së shkoi më tej, duke deklaruar se deputetët demokratë që kishin firmosur për kandidaturën e Endri Shabanit duhet të kërkojnë falje publike.
“Duhet të kërkojmë falje publike secili prej deputetëve që ka firmosur për Avokatin e Popullit dhe Rama le ta gëzojë, se ka 98% të pushtetit, nuk bën diferencë se shkon 99%”, tha Berisha.

Ai sqaroi gjithashtu se deputetët që fillimisht kishin firmosur për Shabanin, më pas i kanë tërhequr firmat brenda afateve ligjore.
“Po ata deputetë që firmosën për Shabanin, me firmën e tyre i tërhoqën më pas firmat e dhëna dhe e bënë këtë brenda afateve ligjore”, theksoi ai.

Gjatë diskutimeve, pati edhe ndërhyrje nga Jozefina Topalli, e cila reagoi ndaj deklaratës së Berishës:
“Jo mor, mos e gëzoftë”, ndërsa Berisha iu përgjigj shkurt: “Ta gëzojë”.

Deklaratat e Kryetarit të PD-së vijnë pas debateve të forta politike lidhur me zgjedhjen e Avokatit të Popullit dhe akuzave për marrëveshje politike mes mazhorancës dhe opozitës.