Kreu i Partisë Demokratike, Sali Berisha, akuzoi qeverinë për dhunë ndaj deputetëve dhe protestuesve gjatë tubimit të 10 shkurtit, duke veçuar rastin e Bledion Nallbatit, ndaj të cilit sipas tij u ushtrua dhunë politike.

Në një dalje për media nga selia blu, Berisha tha se Nallbatit iu hodh gaz lotsjellës në fytyrë ndërsa ndihmonte një të mitur të keqtrajtuar. Ai e cilësoi incidentin si një “akt politik kriminal” dhe e përshkroi hakmarrjen e Ramës si të drejtuar edhe ndaj deputetëve të tjerë të opozitës.

“Dhuna e egër e banditëve dje nuk kurseu as deputetët e Kuvendit popullor. Sulmi ndaj Bledion Nallbatit përbën akt të shëmtuar, një përpjekje për ta asfiksuar me gaz në fytyrë. Kryengritja paqësore e 10 shkurtit faktoi këtë gjë; Rama është i pashpresë,” tha Berisha, duke theksuar se qeveria po synon përballje civile dhe përdor dhunën si mjet hakmarrjeje politike.