Ish kryeministri Sali Berisha ka reaguar ditën e sotme rreth skenave me dhunë dhe incidenteve të ndodhura jashtë Kryesisë së PD. Gjatë një deklarate për mediat, Berisha u shpreh se këto janë skenare të kryeministrit Rama.

Më tej ai theksoi se dënon aktet e dhunës, ku tha se gazetarët të cilët raportonin jashtë selisë janë fyer dhe ofenduar pa të drejtë në orarin e punës.

“Dënoj me forcën më të madhe gangsterët që kanë kërcënuar gazetarët të cilët kanë ndjekur gjithë natën një takim ku ka pasur deputetë dhe jo deputetë dhe në vend që të falënderohen për sakrificën e tyre, gazetarët janë përballur me sharje, me kërcënime rrugaçësh për fajin e vetëm se po bënin me sakrifica të vërteta detyrën e tyre. Nuk jam që tu sugjeroj cilin lajm do të ndjekin, por ata në asnjë rrethanë as nuk mund të fyheshin, as nuk mund të kërcënoheshin. Ata që mendojnë se do mbyllin problemet duket fyer dhe kërcënuar gazetarët janë gangsterë, rrugaçë. Po kështu dënoj kërcënimet që u janë bërë deputetëve, akte këto të një politike dhune të turpshme që ka në origjinë skenarët e Edi Ramës”, tha Berisha.