Sali Berisha ka falënderuar “pararendësit e betejës të 7 tetorit,” siç i quajti mbështetësit që e përkrahin përditë poshtë ballkonit të tij që prej 31 dhjetorit, kur ai u vu në arrest shtëpie. Gjatë një deklarate për protestën e opozitës të hënën, Berisha vuri theksin mbi vendosmërinë e demokratëve, duke thënë se ata janë të gatshëm për çdo sakrificë në mbrojtje të dinjitetit dhe votës së lirë.

“Mirënjohjen më të pakufishme për ju, pararendësit e betejës të 7 tetorit. Pararendësit e marshit të demokratëve, opozitarëve dhe qytetarëve drejt fitores. 23 orë na ndajnë nga dita e fillimit të asaj beteje, ku çdo demokrat dhe opozitar vendos i betuar, i gatshëm për çdo sakrificë për dinjitetin e tij dhe të shqiptarëve,” u shpreh Berisha.

Në vazhdim, ai u ndal te kritikat e ashpra ndaj kryeministrit Edi Rama dhe regjimit të tij, duke e quajtur një regjim të bazuar në krim, drogë dhe vjedhje. Berisha e akuzoi Ramën dhe qeverinë e tij për përçmim dhe diskriminim të popullit opozitar, duke e përshkruar si një sulm të hapur kundër qytetarëve që kërkojnë liri dhe demokraci.

“Populli opozitar, një popull fisnik dhe atdhetar, është përballur këto vite me një regjim që e ka trajtuar me përçmim, duke e diskriminuar dhe duke e detyruar të largohet nga vendi. Krimi, droga dhe hajnia kanë shndërruar procesin zgjedhor në një farsë, ku vota shndërrohet në krim dhe vjedhje të qytetarëve,” përfundoi Berisha.