Sali Berisha, gjatë një bashkëbisedimi me ndjekësit e tij në rrjetet sociale, ka folur në lidhje me situatën në PD-në zyrtare, e cila ka hapur një proces për zgjedhjen e kryetarit të ri.

Berisha e konsideroi si një proces të nisur nga Edi Rama me dy pengjet e tij, duke iu referuar Lulzim Bashës dhe Enkelejd Alibeajt. Më tej, ai shtoi se do të zbatojë statutin dhe do të shkojë votëbesim pas humbjes në zgjedhjet lokale të 14 Majit dhe se nuk merret me dy pengjet e Ramës.

Gjithashtu, ai bëri thirrje për hapje të PD-së se mirëpret këdo dhe se i garantgon se do i dëgjohet zëri.

“Problemet madhore në PD u shkaktuan nga shkelmimi i statutit. Unë jam i betuar dhe i vendosur të zbatoj me përpikmëri statutin, i cili i jep pushtetin anëtarit të PD. Kryetari nëse humbet zgjedhjet lokale, dhe unë e quaj humbje meqë nuk fituam, ndonëse zgjedhjet janë këto që janë, statuti përcakton votëbesimin tim nga anëtarët e PD. Analiza e këtyre zgjedhjeve do bëhet në përputhje me statutin e PD-së. Natyrisht paralel me proceset demokratike të partisë, Edi Rama ka stisur një proces me dy pengjet e tij. Unë mund të them vetëm kaq: pengun nuk ka forcë që e çliron nga pengmarrësi përveç vullnetit të pengmarrësit. Unë nuk merrem me pengje, do merrem me pengmarrësin Edi Rama.

Me shumë kënaqësi mirëpres në PD të gjithë anëtarësinë e saj dhe në këtë kontekst i garantoj se zëri i tyre do të dëgjohet, propozimet e tyre do përfillen dhe nuk ka asnjë pengesë që ne nëpërmjet procedurave statusore të bëjmë zgjidhjet më të mira.
E rëndësishme është të ekzistojë vullneti dhe ndjenja e përgjegjësi që çdo demokrat dhe demokrate ka për hapjen dhe konsolidimin e PD-së, jo vetëm ndaj anëtarëve të saj, por ndaj mbështetësve dhe simpatizantëve të saj.” deklaroi Berisha.