Ish-kryeministri Sali Berisha është ftuar të mërkurën, më 25 Shtator, në Strukturën e Posaçme Anti-Korrupsion (SPAK) për t’u njohur me përfundimin e hetimit ndaj tij për akuzat e korrupsionit. Kjo ftesë vjen dy javë pas mbërritjes së tij në SPAK për t’u njohur me akuzat zyrtare.

Në të njëjtën ditë, do të thirret edhe Jamarbër Malltezi, dhëndri i Berishës dhe bashkëpandehur në këtë çështje. Sipas burimeve, prania e të pandehurve nuk është e detyrueshme për këtë seancë.

Avokati i Berishës ka sugjeruar se ndoshta nuk është e nevojshme që ish-kryeministri të jetë prezent, por nëse ai zgjedh të shkojë, do të ketë mundësinë të japë shpjegime shtesë për çështjen, këtë herë nën statusin e të pandehurit. Ai shprehu preferencën që shpjegimet të jepen në gjykatë, publikisht, në vend të zyrave të SPAK.

Së fundmi, SPAK njoftoi përmbylljen e hetimit ndaj biznesmenit Fatmir Bektashi, i akuzuar për korrupsion përmes Malltezit. Hetimi i dosjes “Partizani” përfshin pesë persona të pandehur. Pasi të informohen për përfundimin e hetimit, ata kanë 10 ditë për të paraqitur kundërshtime, pas së cilës SPAK do ta dërgojë dosjen në gjykatë për gjykimin paraprak.