Kreu i Partisë Demokratike, Sali Berisha, ka shpërthyer me akuza të forta ndaj kryeministrit Edi Rama lidhur me çështjen e mandatin të Fredi Belerit në Himarë. Nga një deklaratë publike e mbajtur pas një vizite në jug të vendit, Berisha akuzoi Ramën për shkelje të Kushtetutës dhe të Konventës Europiane të të Drejtave të Njeriut, duke e cilësuar si një akt të pastër të grabitjes politike të votës.

“Po vij nga Himara. A e patë çfarë ndodhi? Ia mori mandatin Fredi Belerit dhe u struk në shtrofullën e fundit të horrave,” – tha Berisha, duke e akuzuar kryeministrin se po përdor kartën e nacionalizmit për të justifikuar veprimet e tij.

Sipas Berishës, Rama ka dashur të shmangë marrjen e disa pronave në zonat e Gjipesë dhe Manastirit të Skutarasë, duke e penguar Belerin të marrë detyrën përmes një skenari të mirëmenduar politik. “Përdor nacionalizmin, i çoi marrëdhëniet në thikë e pikë… ai, ato toka që ke plaçkit në Gjipe dhe në Manastirit të Skutarasë nuk do t’i merrje kurrë se nuk janë të tuat,” u shpreh Berisha.

Ai shkoi më tej duke ironizuar prejardhjen e kryeministrit: “Vetë ata të tutë e kanë lënë me dokumente, kanë patur vetëm 5 dhi e 4 dele. S’kanë patur asnjë tjetër. Kanë qenë më të varfrit e asaj zone.”

Deklarata e Berishës vjen në një kohë kur çështja e Fredi Belerit ka marrë përmasa ndërkombëtare, veçanërisht pas reagimeve nga qeveria greke dhe institucione europiane që kanë shprehur shqetësime për respektimin e të drejtave të njeriut dhe të votës së lirë në Shqipëri.