Juristi Ivi Kaso në një intervistë ka folur në lidhje me qëndrimin që do të mbajë Partia Demokratike sa i takon Komisionit të Reformës Zgjedhore, ku përfaqësohen nga Oerd Bylykbashi. Edhe pse Berisha tha se PD nuk do të ishte pjesë e Komisionit, Kaso tha se në rezolutën që ka miratuar Kuvendi thuhet qartë se bojkoti është i ndaluar.

“Më lejoni të sqaroj pozicionin e PD për Reformën Zgjedhore, shpresojmë që të mos jetë ushtrimi i radhës që kërkohet nga partnerët ndërkombëtarë, për të kënaqur rekomandimet e ODHIR. Shpresojmë që të adresohen shqetësimet e të gjitha forcave opozitare, ka një rezolutë të Kuvendit të PD, që të hiqet dorë nga bojkotet në çdolloj përballje.

Vizioni dhe lidershipi i PD kanë përcaktuar që PD nuk do ti shmanget asnjë përballje, do të jemi aty kudo dhe në çdo tryezë për të dhënë me forcë qëndrimin ton”, tha Kaso, i cili paralajmëroi edhe mundësinë e pazareve, nga një pjesë e opozitës.

“Ne shpresojmë që opozita të mos bëhet pjesë e lojës së Ramës, siç është primi që është përfolur në media. Do të ishte minim i çdolloj standardi dhe qasje demokratike, do të ishte një atentat për demokracinë në vend. Qendrimi ynë është i palëkundur, primi që i dhurohet mazhorancës, do të ishte një pushtet pa votë, shpresoj që këto zëra të marrin fund”, u shpreh më tej Kaso.

Sa i takon ndryshimit të sistemit zgjedhor, Kaso tha se kjo është një çështje që u takon të gjithë shqiptarëve, më e madhe sesa interesat e partive.

“Kjo kërkon që të merret mendimi i të gjithë segmentëve të shoqërisë, në çdolloj tryeze ne do të jemi prezent dhe do të paraqesim qendrimet tona. Kemi hequr elementë të sistemit me ndërhyrje në Kushtetutë, që nuk përmbushin kriteret për një përfaqësim dinjitoz”, deklaroi Kaso.