Në mbledhjen e sotme të Qeverisë është miratuar një projekt i ri infrastrukturor për qarkun e Shkodrës, i quajtur “Porta e Alpeve”. Lajmi u bë i ditur nga Ministri i Infrastrukturës dhe Energjisë, Enea Karakaçi, gjatë një deklarate për mediat pas përfundimit të mbledhjes.

Sipas tij, projekti ka një vlerë totale prej 100 milionë eurosh, ku 50 milionë euro financohen nga Banka Evropiane e Investimeve dhe 50 milionë euro nga buxheti i shtetit.

Karakaçi sqaroi se ndërhyrjet përfshijnë rehabilitimin e hapësirave urbane, rikonstruksionin e bulevardeve dhe krijimin e qendrave multifunksionale në qytet, me qëllim rritjen e hapësirave publike për qytetarët.

Një tjetër komponent i projektit parashikon ndërhyrje në infrastrukturën lidhëse mes zonave turistike të Velipojës, Liqenit të Shkodrës, lumit Buna, Malësisë së Madhe dhe zonës së Alpeve.

Po ashtu, projekti përfshin investime në rrjetin e ujësjellësit dhe kanalizimeve, si dhe përmirësime në transportin urban dhe menaxhimin e mjedisit në zonat e banuara dhe turistike.