Kreu i Partisë Demokratike, Sali Berisha, ka njoftuar datën e protestës së dytë kombëtare që opozita do të zhvillojë këtë vit përpara Kryeministrisë. Protesta do të mbahet më 10 shkurt, në orën 17:00, në Tiranë.

Gjatë deklaratës së tij, Berisha u bëri thirrje qytetarëve nga të gjitha shtresat shoqërore që të bashkohen në protestë, duke e cilësuar qeverinë aktuale si një “organizatë kriminale” me në krye kryeministrin Edi Rama. Ai theksoi se vetëm reagimi qytetar, revolta dhe qëndrimi i vendosur kundër padrejtësisë, korrupsionit dhe varfërimit mund të sjellin ndryshim.

Sipas Berishës, Shqipëria ndodhet përballë një situate të rëndë ekonomike dhe sociale, ndërsa qeveria, sipas tij, vazhdon të sfidojë dhe të ofendojë qytetarët. Ai u shpreh se largimi i kësaj qeverie nga pushteti është i domosdoshëm për të hapur rrugën drejt një qeverie teknike dhe mbajtjes së zgjedhjeve të ndershme.

Berisha theksoi se sovrani, përmes zërit dhe revoltës së tij, është i vetmi faktor që mund të detyrojë qeverinë të largohet. Ai shtoi se protesta pritet jo vetëm brenda vendit, por edhe nga shqiptarët në diasporë dhe mbështetësit e tyre kudo në botë.

Në përfundim, lideri i opozitës ftoi të rinjtë, gratë, burrat dhe të moshuarit që më 10 shkurt të mblidhen në Tiranë për të shprehur kundërshtimin e tyre dhe për t’i dhënë, sipas tij, “leksionin e merituar” qeverisë aktuale.