Sarandë – Deputeti socialist Ardit Bido ka akuzuar ish-drejtorin e Bordit të Entit Kombëtar të Banesave, Flamur Noka, për përvetësim të apartamenteve të destinuara për familjet nevojtare në Sarandë. Denoncimi u bë përmes një videoje të publikuar në rrjetet sociale, ku Bido tregoi se disa banesa të pallatit me pamje nga deti dhe ishulli i Korfuzit u dhanë familjarëve të Nokës, të cilët nuk kishin lidhje me qytetin dhe nuk ishin të pastrehë.

“Njëri pallat ka ballkon dhe pamje nga deti, tjetri nuk ka ballkon dhe pamje nga pallat tjetër. Në pallatin me pamje nga deti vendosën familjet e Noka dhe disa të afërm të tyre, ndërsa pallati tjetër shkoi te familjet nevojtare sarandjote,” shpjegoi Bido. Ai shtoi se disa nga përfituesit ishin nga Kukësi, Belgjika dhe pjesë të tjera të vendit, të cilët dolën me pasaportizim në Sarandë tre muaj para shpërndarjes së apartamenteve.

Deputeti theksoi se nuk ka nevojë për letra për denoncim, pasi SPAK ka nisur hetimet për shpërdorim detyre, fshehje pasurie dhe pastrim parash lidhur me këtë çështje. Sipas tij, gjatë kohës që Noka drejtonte Entin e Banesave, katër apartamente të fondit të të pastrehëve iu dhanë familjarëve të tij, duke përfshirë dy vëllezër që jetonin në Belgjikë, gruan e vëllait dhe motrën e tij.

Ky denoncim rikthen fokusin mbi shpërndarjen e banesave sociale në Sarandë dhe dyshimet për keqpërdorim të fondeve publike, ndërsa SPAK vijon hetimet mbi këtë çështje.