“Big Brother Fan Club” hyn zyrtarisht në edicionin e tij të pestë, duke sjellë një formacion që ka ndezur menjëherë entuziazmin e publikut. Top Channel ka prezantuar ekipin drejtues përmes një videoje promocionale kreative, të konceptuar si një bisedë në grup në WhatsApp, duke konfirmuar zërat që prej ditësh qarkullonin në rrjet.

Në krye të programit do të jetë Kiara Tito, e cila merr rolin e moderatores, ndërsa në krah të saj rikthehet Arjan Konomi, një emër i njohur dhe mjaft i komentuar për publikun e formatit “Big Brother”.

Rikthimi i Arjan Konomit në Top Channel, pas rreth tre vitesh mungesë, është lajmi që ka shkaktuar reagimin më të fortë në rrjetet sociale. Ish-opinionisti i “Big Brother” dhe “Për’puthen” kthehet në ekranin ku u shndërrua në një nga figurat më të diskutuara, duke sjellë sërish stilin e tij të drejtpërdrejtë dhe pa kompromis.

Largimi i Konomit nga Top Channel, në kohën kur ndodhi, u shoqërua me shumë diskutime publike. Vetëm së fundmi, ai ka folur hapur për këtë episod në podcastin e Arbana Osmanit, ku tregoi se gjithçka nisi pas një postimi në Instagram, në të cilin kritikonte nivelin e opinionistëve të “Big Brother VIP” të asaj periudhe.

“Më kërkuan ta fshija postimin, por unë refuzova. U thashë se mendimin tim nuk e heq”, ka deklaruar Konomi, duke theksuar se vendimi për t’u larguar ishte i lidhur me mbrojtjen e lirisë së shprehjes dhe integritetit të tij profesional.

Me këtë formacion të ri, “Big Brother Fan Club” pritet të sjellë një sezon dinamik, me diskutime të forta dhe analiza të drejtpërdrejta, duke rritur pritshmëritë e publikut për edicionin e pestë të programit.