Bjellorusia ka filluar stërvitjet ushtarake me raketat dhe avionët luftarakë që janë në gjendje të bartin armë taktike bërthamore, të cilat Rusia i transferoi atje disa kohë më parë.

Ushtrimet ushtarake filluan vetëm një ditë pas njoftimit nga Rusia për synimin e tyre për të kryer stërvitje të ngjashme për simulimin e përdorimit të armëve bërthamore të fushëbetejës. Kjo deklaratë vjen si përgjigje ndaj deklaratave të zyrtarëve perëndimorë lidhur me një mundësi të përfshirjes së Perëndimit në luftën në Ukrainë.

Ministri i Mbrojtjes i Bjellorusisë, Viktor Khrenin, ka bërë të ditur se një njësi raketash me rreze të mesme veprimi, Iskander, dhe një skuadrilje avionësh luftarakë, Su-25, do të marrin pjesë në stërvitje.

Këto stërvitje filluan në ditën e betimit të mandatit të pestë të presidentit rus, Vladimir Putin, dhe Bjellorusia ka ofruar terrenin e vet si bazë potenciale për luftën në Ukrainë.

Rusia ka zhvendosur disa armë të veta taktike bërthamore në Bjellorusi, e cila kufizohet edhe me Ukrainën dhe anëtarët e NATO-s, duke lehtësuar aksesin në këtë armatim në rast nevoje.

Për dallim nga raketat interkontinentale balistike bërthamore, armët taktike bërthamore janë më pak të fuqishme dhe janë të dizajnuara për të përdorur kundër trupave në fushëbetejë. Zhvendosja e tyre në Bjellorusi i mundëson Rusisë të godasë më lehtë disa aleatë të NATO-s në Evropën Lindore dhe Qendrore.