Ministri i Turizmit, Kulturës dhe Sportit, Blendi Gonxhja, deklaroi sot se 600 praktikantë përfituan nga Programi Kombëtar i Praktikave të Punës në vitin 2025, duke i vlerësuar si arkitektët e një administrate publike moderne.
Në takimin përmbyllës të thirrjes së 10-të të programit, Gonxhja theksoi:
“Shpesh dëgjojmë se Evropa është ‘atje jashtë’, diku ku duhet të ikësh për ta gjetur. Por e vërteta është se Evropa që ne duam nuk është një destinacion gjeografik, është një standard jetese që po e ndërtojmë këtu, bashkë.”
Ministri nënvizoi se për vite me radhë administrata publike është parë si një ‘kafaz burokratik’, por sot imazhi i vjetër i përket të shkuarës:
“Ju jeni dëshmia e këtij transformimi rrënjësor. Sot shteti nuk flet nga lart, por ecën krah për krah me të rinjtë dhe ju fton të bashkoheni e të kontribuoni për vendin. Ju nuk jeni thjesht punonjës të rinj, por arkitektët e një administrate moderne, transparente dhe në shërbim të plotë të realitetit që na rrethon.”
Gonxhja theksoi gjithashtu:
“Përmes Programit Kombëtar të Praktikave të Punës, nuk po hyjnë thjesht emra të rinj në listëpagesa, po hyn një mendësi e re. Për herë të parë në vitin 2025, puna juaj u çmua financiarisht, si certifikata e parë e dinjitetit, një mesazh i qartë se dija juaj ka vlerë dhe shteti e respekton atë që në hapin e parë. Dhe mbi të gjitha, janë 250 kontrata të para pune që vërtetojnë se rruga nga shkolla te mundësitë e punësimit konkret kalon vetëm përmes meritës.”
