Deputeti i Partisë Socialiste, Blendi Klosi, ka folur sot për vendimin e përjashtimit të deputetëve të opozitës disa javë më parë, duke theksuar se mazhoranca nuk është ajo që dënon opozitën, por ligji dhe rregullorja e Kuvendit. Ai u shpreh se opozita po tregon një shembull të keq me bërjen e politikës me dhunë dhe përdorimin e metodave të tilla si djegia e karrigeve.

“Kur ishim në opozitë, ne u përjashtuam edhe vetëm për thënien e fjalës ‘Nafije’, sot ju vini këtu dhe bëni politikë me dhunë. Si mund të imagjinoni që një nga fëmijët tuaj të djegë karrige në shkolla? Çfarë shembulli po jepni?”, tha Klosi, duke iu drejtuar deputetëve të opozitës. Ai theksoi se për çdo veprim të tillë, si djegia e karrigeve, opozita do të dënohet sipas ligjit dhe do të përballet me pasojat për dëmtimin e pronës publike.

Klosi shtoi se opozita nuk mund të ndalojë zhvillimin e vendit me veprime të tilla dhe se PS do të vazhdojë të jetë fituese, siç ka qenë për 30 vjet. “Ne jemi PS, ju kemi mundur në 30 vite dhe do t’ju mundim sërish. Pavarësisht se çfarë bëni, na ndajnë vetëm pak muaj nga gara e ardhshme dhe, nëse mendoni se do të merrni më shumë vota duke djegur karrige, djegini”, përfundoi Klosi, duke theksuar se opozita duhet të bëjë politikë me ndërgjegje dhe të ndalë me veprimet e dhunshme.